The Albanian
Nuk ishte aq shumë befasuese shifra e dhënë nga zëdhënësi i KQZ-së në Kosovë z.Valmir Elezi. U duk si dritëhije që përmbysi në njëfarë mënyre shifrën 0 të “interesimit për të votuar” tek ambasada e Kosovës në Londër. Pra nga 32 kërkesa të paraqitur nga qytetarët e Kosovës që jetojnë në Britani pranë KQZ-s së Kosovës 30 janë miratuar. (E theksojmë qytetarë të Kosovës që jetojnë në Britani, pra jo-domosdoshmërisht shqiptarë…)
Në të vërtetë është një shifër tronditëse që hap një diskutim të gjerë. Nëse do të bëhet një përllogaritje e thjeshtë kjo shifër do të thotë 3-4 familje. Po pse ky indiferentizëm kaq ekstrem?
Nga të intervistuarit për këtë çështje dalin shumë arsye, por ajo që duhet theksuar është se detyrimisht duhet t’i jepet fund kësaj “pajtueshmërie” me këtë gjendje, qoftë nga ata që konsiderohen institucione të shtetit të Kosovës, shoqërisë civile e deri tek diaspora në Britani.
Nëse institucionet e Kosovës “mjaftohen” me dhënien e të drejtës për votim të diasporës, kjo nuk është aspak e drejtë dhe kjo “mjaftueshmëri” duhet ë marrë fund dhe të nisë një proces i ri bashkëpunimi, të paktën me shqiptarët e Kosovës në Britani.
Nëse i rikthehemi kujtesës përveç presidentes Jahjaga që vitin e kaluar organizoi një pritje për diasporën e këtushme, dhe një vizite të Ministrit të Diasporës, të tjerët megjithë vizitat e shpeshta, “harruan” që të organizojnë qoftë edhe një pritje simbolike me përfaqësuesit e shqiptarëve të këtushëm.
Duket se që nga këtu ka filluar “ngrirja” duke shtuar edhe faktin se thuajse asnjë parti politike nuk ka shfaqur “ndonjë interes” për këta votues. Në këtë situatë duket se qytetarët e Kosovës në britani janë ndjerë të braktisur dhe kanë refuzuar në masë të ushtrojnë të drejtën e tyre, atë që konsiderohet si obligim qytetar për të votuar.
Mbase tek shumë pjesëtarë të diasporës akoma vazhdon të mbetet shpresa e realizimit të premtimit se disa vende në parlament do të jenë vetëm për diasporën.
Duhet theksuar se që me mbarimin e luftës në Kosovë, përveç disa organizimeve simbolike ka rënë edhe motivimi për të qenë “të angazhuar” veçse në disa shoqatëza.
Është momenti kur qoftë të zgjedhurit apo intelektualët e këtushwm ,të ndërmarrin hapa konkretë për një ri-organizim të fuqishëm me shpresën se edhe institucionet e shtetit të Kosovës do të ndryshojnë kursin e tyre përkundrejt diasporës shqiptare në Britani.
Prof.Dr.Sc. Akil Mark Koci
Vota demokratike e Diasporës e forcon Kosovën
Epoka jonë historike është mjaft e hidhur, sepse që nga sundimi i egër i Mbretërisë Otomane dhe nga sundimi i Serbisë, që janë munduar të na zhdukin me farë e me fis, nuk kemi parë ditë të mira. Por, Kosova edhe tash pas çlirimit të saj, konsiderohet si vendi më i korruptuar dhe më i varfër në tërë pjesën e Evropës!
Në këtë situatë, dhe në kushte të tendosura politike, zhvillohen edhe zgjedhjet duke mos e ditur, apo nuk dëshiron ta dijë, Paria në pushtet, se Kosovën përditë e lëshojnë me qindra banorë të saj për të kërkuar kushte më të qëndrueshme jete dhe jetë më të sigurt.
Mendoj kështu pse, siç e dëshmon realiteti politik, partisë në pushtet sikur nuk i interesojnë votat e Diasporës, edhe pse vota demokratike e Diasporë e forcon Kosovën!
Për votat e Diasporës nuk janë bërë kurrfarë përgatitjesh, për shkak se partia në pushtet është e sigurt se votat e Diasporës nuk do t’i jepen kësaj partie demokratike, siç e quan kjo veten. Këtë e dëshmon edhe fakti se janë paraqitur vetëm 30 veta, që do të votojnë në Mbretërinë e Bashkuar!
Diaspora gjithnjë ka qenë ajo që i ka ndihmuar qytetarët e Kosovës, e këtë gjë ajo e bën edhe sot.
Prandaj mendoj se është dashur, domosdo, që për zgjedhjet të bëhen përgatitje më të mira e jo të paorganizuara si tash, kur nuk e dimë se si dhe ku do të zhvillohen zgjedhjet. Unë për vete as që do të votoj, sepse nuk e di qartë se ku dhe kur do të votohet!
Daut Dauti
Në zgjedhjet e para demokratike në Kosovë, të organizuara nga KQZ në kuadër të OSBE-së në vitin 2000, numri i qytetarëve të interesuar për votim ishte shumë i madh edhepse zgjedhjet ishin të karakterit lokal. Shumë qendra të votimit patën shtyrë afatin e votimit deri vonë në mbrëmje. Numri i votuesve arriti në 79 %. Megjithatë, kishte qytetarë që kishin mbetur pa votuar për shkak se nuk u kishte ardhur radha
Kjo ishte një shifër rekorde e votimit e cila nuk u arrit më asnjëherë. Në zgjedhjet e ardhshme përqindja sillej rreth 50% dhe shpesh nën te. Rënia drastike e përqindjes së votuesve është bërë për shumë arsye por më së shumti për shkak të humbjes së interesimit të qytetarëve për të votuar. Interesimi me siguri ka rënë për shkak se qytetarët janë dëshpëruar me partitë politike dhe nuk besojnë se mund të ndikojnë në përmirësimin e gjendjes. Prandaj, çështjen e votimit e shohin si punë të kotë.
Gjatë zgjedhjeve të fundit KQZ ka mundësuar që në proces të votimit të marrin pjesë edhe qytetarët që gjenden jashtë Kosovës. Votimi bëhet me anë të postës por regjistrimi dhe e tërë procedura duket të jetë mjaft e komplikuar. Sipas rregullave të KQZ “çdo votues i cili mungon përkohësisht në Kosovë” ka të drejtë që të votojë nga vendi ku gjendet. KQZ ka nxjerrë dispozita tjera juridike për të rregulluar këtë mënyrë të votimin por definimi i votuesit është i paqartë. Nuk është e qartë se cilët qytetarë që gjenden jashtë Kosovës përfshihen me termin “mungesë në Kosovë”. Mungojnë ata që ato ditë gjenden turistë jashtë Kosovës, me punë të përkohshme apo ata të cilët jetojnë dhe punojnë në ndonjë shtet tjetër ku mund të jenë edhe shtetas të vendit përkatës?
Çfarëdo që është intenca e kësaj rregulloreje, dhe pa marrë parasysh statusin juridik të qytetarëve të Kosovës, interesimi i tyre për të votuar është tejet i vogël. Në Britani të Madhe të regjistruar për të votuar në këtë mënyrë figurojnë diku rreth 30 veta. Kaq numri i atyre që në këtë shtet kanë shprehur interesim për të votuar ata të cilët në zgjedhjet e 3 nëntorit janë kandidatë për asambletë komunale dhe kryetarë të komunave.
Në shtetet tjera të Evropës numri i të interesuarve për këtë lloj votimi mund të jetë më i madh. P.sh. në Zvicër e Gjermani numri i tyre është i lartë pasi që në këto vende ekzistojnë edhe degë të partive politike dhe një traditë më e gjatë e aktivitetit politik. Por, edhe në këto vende, as përafërsisht, numri i votuesve potencialë nuk përputhet me numrin e atyre që kanë shprehur dëshirë të votojnë.
Kjo sërish duhet të shpjegohet se ky mos interesim vjen si rezultat i shumë arsyeve. Dëshpërimi me partitë politike duhet të jetë arsyeja kryesore.
Votuesve u duken të njëjta të gjitha partitë politike dhe nuk shohin alternativa. Pothuaj nga të gjithë mund të dëgjosh ankesa se vendi është zhytur në probleme, sidomos në korrupsion, dhe nuk besojnë se ndonjë nga partitë politike ka qëllim serioz që ta luftoj këtë dukuri negative që ka kapluar çdo skutë të institucioneve të të gjitha niveleve në Kosovë. Prandaj, abstenojnë nga votimi që është një detyrë dhe drejtë e tyre e rëndësishme qytetare. Një arsye tjetër që dëgjohet shpesh është edhe shërbimi joadekuat apo niveli joprofesional që ofrojnë ambasadat e Kosovës në këtë aspekt.
Për të ndryshuar këtë gjendje dhe për të rritur interesimin e votuesve të këtij lloji duket se duhet shumë punë për të bërë. Në këtë proces duhet të angazhohet më seriozisht KQZ, ambasadat por edhe partitë politike dhe institucionet tjera në Kosovë.
Adelina T. Badivuku
Mendoj që si në çdo proces tjetër diaspora është neglizhuar edhe në procesin e zgjedhjeve. Informimi për mënyrën e regjistrimit ka qenë minimal e i paqartë. Në Britani Ambasada e Kosovës nuk di të ketë bërë ndonjë hap për t’i inkurajuar kosovarët të regjistrohen.
Mund edhe të mos jem e informuar saktësisht, po biseda rreth zgjedhjeve ka kaluar gati në humor. Unë personalisht nuk jam regjistruar edhe për arsye të zhgënjimit personal në politikën që zhvillohet në Kosovë, dhe fatkeqësisht duke mos besuar që kandidati që mund ta ketë votën time ka shanse të fitojë, kam vendosur të abstenoj. Sigurisht jo zgjedhje e mirë dhe definitivisht kam humbur duke mos e shfrytëzuar rastin të kontribuoj në një ndryshim të mundshëm. Megjithatë ky është realiteti dhe vendi im.
Abedin Bajraktari
Shqiptarët apo qytetarët e komunitetit Kosovar në Britani të Madhe kanë rënë në “gjumë” dhe ndihen shumë rehat kështu si janë, pa u angazhuar. Nuk kane interesim të organizohen sikurse edhe kanë ditur të organizohen vite më parë. Patriotët nuk angazhohen vetëm kur vendi është në lufte, ata duhet të kontribuojnë edhe në “paqe” sepse nevoja për patriotët është e pashtershme. Jam i pajtimit se edhe ky komunitet ka nevojë dhe po pret për një “zë” të fuqishëm apo një thirrje të re, që do të na zgjonte nga gjumi dhe të na ngacmonte ndërgjegjen për t`u organizuar. Me këtë gjendje në të cilën ndodhemi sot, vetëdeklarojmë se ne nuk jemi patriotë!
Ky komunitet natyrisht se ka nevojë edhe të thirret dhe të kontaktohet nga qeveritarë e Ministra të Kosovës për të mbajtur tubime të përbashkëta, dhe në këtë rast në lidhje me votimet, të vijnë paraprakisht të jepin shpjegimet mbi procedurat e votimit dhe të ngjallin dhe ngrtnin moralin e bashkeëtdhetareve, por edhe të dëgjojnë hallet dhe mendimet e tyre.
Disa nga arsyet e mos angazhimit të shqiptarëve të Kosovës në BM për të votuar janë se nuk ekziston një komunitetit gjithëpërfshirës –Bashkësi e shqiptarëve të Kosovës sikurse gjatë viteve ‘90.
Mungesa e një qendre apo Klubi i shqiptareve ku do te mblidheshin edhe për aktivitete të përbashkëta por edhe për informim të natyrave të ndryshme, në këtë rast informimi rreth votimit në Kosovë.
Mos interesimi i përfaqësuesve të Kosovës për të vizituar apo kontaktuar komunitetin shqiptar të Kosovës dhe për të sqaruar mbi mundësitë, formën dhe mënyrën e votimit,
Mos ndërgjegjësimi i qytetareve të Kosovës për të votuar dhe për të dhënë kontributin e tyre. Kur i shtojmë këtu edhe aspirateën për bashkim kombëtar, atëherë shqiptarët e Kosovës duhet t`I përvishen punës dhe të punojnë shumë krahas me bashkëkombësit nga Shqipëria dhe jo të rrimë duarkryq dhe të painteresuar.
Këtu ka edhe mungesë patriotizmi nga ana jonë dhe neglizhence ndaj gjendjes së atyre qytetareve që jetojnë në gjendje të mjerueshme në Kosovë.
Mund të jetë edhe mosbesimi se edhe po votuan , nuk shkon vota në vendin e duhur etj…
Mund të përmendet edhe mungesa iniciativës dhe vullnetit nga ana e Ambasadës së Kosovës për të tubuar dhe kontaktuar komunitetin shqiptar të Kosovës këtu, shoqatat dhe veprimtarët e ndryshëm.
Mund të ketë arsye nga më të ndryshme por që vete qytetarët e Kosovës që jetojnë në Britani të Madhe mund dhe duhet të deklarohen së paku nëpërmjet gazetës tanimë shumë të njohur “ The Albanian”.
Rexhep Bajraktari
Mendoj se disa nga arsyet se pse unë dhe bashkatdhetarët shqiptarë që jetojnë jashtë Kosovës nuk mërziten shumë për të votuar për “kandidatet e tyre” ne Kosovë janë disa, prandaj dhe do të mundohem që këto arsye t’i numëroj në formë alfabetike, (kësaj radhe me qe edhe gazeta The Albanian botohet ne Mbretërinë e Bashkuar do mundohem që ta ndjek alfabetin Anglez)
Apatia: Janë mërzitur dashamirët e Kosovës duke parë ëndrra dhe menduar se mund të bëjnë ndryshime me votën e tyre.
Beauty: Janë mërzitur dashamirët e Kosovës duke parë politikanë që mundohen të bindin popullin me pamjet e tyre fizike të veshur me kostume të shtrenjta dhe mjekra të çuditshme, besa edhe makina të shtrenjta e dore për dore me femra të bukura.
Cosmetic: Janë mërzitur “mileti” duke dëgjuar deklarata kozmetike dhe duke përdorur fjalë të huaja mendojnë se e bindin popullin me fjalët e tyre te famshme (p.sh. sot ne brifingun e morningut internacional ….)
Dummy: Shumica jonë mendojmë se kjo qeveri ka vetëm shprehet për ata që të tjerët ua vizatojnë se si duhet të shprehen dhe çfarë duhet të flasin, prandaj në shumicën e rasteve pasi dëgjojmë kandidatët dhe parlamentarët pyetja e përgjithshme është se “çka tha bre se nuk e morra vesh”.
Evident: Këta kandidatë për zgjedhje së bashku me bosat e tyre nuk janë marrë me evidentimin e pasurive humane dhe evidentimin e pasurive të Kosovës.
Fake: Këta kandidate ( normal jo të gjithë se për ndryshe vaj halli për popullin) kanë ardhur në skena dhe janë formuar në baza falsifikimi si brenda ashtu edhe jashtë Kosovës, sepse janë munduar politikanët tanë dhe ndërkombëtarët që të bëjnë përshesh me shpresë se populli do ta hajë me shijshëm, p.sh. krijimin e vendeve të lira kote siç janë karriget e parlamentarëve të cilët kanë zënë vendet e tyre në parlament (në ballë të oxhakut), por që faktikisht nuk janë zgjedhur nga populli…
Guiltiness: Sepse populli i cili luftoi me dekada të tëra ka ra në depresion duke menduar se pse, për kë dhe për çfarë paskemi luftuar? Dhe tani për se dhe për ke duhet te votojmë…
Huliganism: Sepse populli ka ardhur në një përfundim se individë të shume për kandidate nëpër të gjitha partitë janë thjeshte huliganë ose te paktën sjelljet e tyre ashtu te lejnë te mendosh.
Innefective: Sepse këta qeveritarë nuk kanë bërë asgjë për bashkimin e mërgatës, por përkundrazi, kanë krijuar ndasi pikërisht me formimin e partive politike në diasporë në mesin e mërgimtarëve.
Judgmental: Sepse bashkatdhetarët janë bindur se kjo qeveri dhe shumica e kandidatëve shkojnë në parlament me paragjykime dhe paragjykimet e tyre mundohen t’i bëjnë ligje dhe t’i inkuadrojnë ato në masë kinse janë si rrjedhojë e ligjeve evropiane sepse në këtë mënyrë mendojnë se do të pinë ujë tek masa.
Killers: Sepse qeveritarët e sotshëm akuzohen si mafiozë… mundohen që ta mbysin fjalën e lire, dhe flitet se kanë dorë në likuidimin e bijve dhe bijave të kombit.
Lickers: Sepse kandidatet për zgjedhjet e tyre nëpërmes votimeve janë Lëpirëse/sa tek bosat e tyre dhe ndërkombëtaret por edhe armiqtë e kombit.
Mistrust: Sepse votuesit nuk ju besojnë politikanëve se kanë vizion për Kosovën.
Negativity: Sepse votuesit kanë mendime negative dhe e vërteta është se nuk e dinë se çfarë apo kush janë ata që votojnë, por ata nuk mërziten fort për votuesit se kush vjen e kush shkon.
Obsesed: Sepse tashmë jemi bindur çdo dite e më shumë se politikanët tonë kontrollohen nga një forcë e fuqishme e jashtme që vetëm ata e dinë se nga e ka prejardhjen, ndërkohë që vrapojnë si pulat pa krye duke u munduar të na bindin me anë emocionesh se gjoja sikur po punojnë ditë e natë.
Puppies: Pse more në fund të fundit duhet të votoj për një kandidat mendjemadh e arrogant që në fakt akoma nuk e ka kaluar periudhën e pubertetit politik?
Quickies: Pse duhet të votoj për kandidatë të cilët i bëjnë gjërat me nguti, dhe shpejtësi duke e lëne logjikën ne gjumë, këtu bëjnë pjesë projektet madhore të ndërtimeve, tenderëve, shitjeve të pasurive kombëtare…
Radicals: Pse duhet të votoj për kandidat radikalistë të cilët kur mblidhen si llavat e ujqve të cilët favorizojnë ndryshime ekstreme, duke kopjuar kulturat dhe taborret e të huajve dhe duke menduar që ato nene e rregulla do të funksionojnë edhe në Kosovë.
Secularist: Pse duhet te votoj për kandidate që në emër të sekularizmit mundohen të më bindin se besimi nuk është pjese e identitetit tim dhe se e tillë besimi duhet të përjashtohet si formë edukimi.
Too, Pse duhet te votoj për kaq shumë kandidatë kur nuk është e qartë se a po formojnë ekipe futbolli apo persona që përfaqësojnë nevojat e popullit.
Unjust: Pse duhet të votoj për kandidatë që e kanë për turp dhe nuk bazohen në sjelljet e tyre në përputhje me trashëgiminë dhe moralin e drejtë dhe të ndershëm, çuditërisht dhe padrejtësisht mundohen te bindin te huajt për kulturën, identitetin, dhe besimin tone sikurse te tjerët qe na formuan e dine kulturën dhe traditën tone ashtu sikur atyre ju konvenon te dinë.
Vetted: Pse duhet të votoj për kandidatë kur shumica e tyre nuk janë të kontrolluar ashtu siç kontrollohen kuajt kur dalin për gara kalorësie, pra nuk e dimë se a janë te pastër dhe në gjendje që këta kandidatë të vrapojnë për popullin apo për vet veten e tyre siç po ndodh aktualisht, pra siç e thotë populli “a kanë therrë në kamë”.
Warlords: Pse duhet të votojmë për njerëz që shiten sikur gjoja janë komandantë ushtarakë, qe me sloganet e tyre sikur na ishim çlirimtarët e Kosovës ndërkohë qe gjate gjenocidit te 1998/9 ne Kosove pikërisht disa nga komandantë po “agjëronin” neper hotelet e Tiranës si ne Rogner dhe 15 katsh dhe se kanë liri dhe autonomi absolute.
Xenophob: Pse duhet të votoj për kandidatë te cilët janë ksenofob ndaj ballafaqimeve me botën e integruar dhe te ligjit, dhe ksenofob për të nxitur ligje qofshin ato ligje hyjnore apo kushtetuese, politika sociale dhe ekonomike me kushte që qeveria të jep llogari ndaj ligjit e jo ligji të varet nga kushtëzimet e liderëve partiak të cilët shkojnë e vijnë.
Yobs: Pse duhet të votoj për ata kandidatë që me sjelljet e tyre të pasjellshëm, të zhurmshëm dhe agresivë duken sikur kanë dalë nga pijetoret.
Zombie: Pse duhet të votoj për kandidat të cilët flejnë në kohën kur duhet të punojnë, dhe reagojnë vetëm atëherë kur t’jua merr gjeli biberonin nga goja, për ndryshe as nuk reagojnë pa e marre pëlqimin e këmbëve të bashkuara sepse kanë frikë se mos ato ju hapin probleme.
Për shkak se ne në Kosovë tashmë u ngopëm me të gjithë politikanët qe te paktën kanë dal ne skenë së fundmi sidomos me këta qe shohin ëndrra dhe pretendojnë se na e liruan Kosovën, duke na premtuar gjate zgjedhjeve se do të bjerë borë në Kosovë gjatë stinës së verës dhe se do ta zhvillojmë turizmin detare në Kosove gjatë stinës së dimrit, pra premtojnë një gjë dhe bëjnë një tjetër, kurrë dhe asnjëherë nuk ju përgjigjen pyetjeve dhe halleve të votuesve me përgjigje të drejtë, dhe tashme jemi future në një periudhë ku edhe ata votuesit edhe të votuarit jemi në një thes dhe votuesi mendon se asgjë nuk mund të ndryshojë me votën e tij ndërkohë që i votuari pajtohet me këtë sepse e dine se edhe po ta zeje gjumi s’ka kush qe e zgjojnë.
Në rastin e pushtetit politik në Kosovë, forca, ligji, rregullat dhe urdhërat vlejnë vetëm për të varfërit “kokë boshat” dhe njerëzit e butë, këtë edhe e provova tani verës kur isha në Kosovë.
Mendoj se përfaqësuesit e shtetit tonë nuk kane vizione që të mësojnë gjeneratat dhe fëmijët tanë që të respektohen ligjet dhe Kushtetuta me vete sjelljet dhe punën e tyre.
Të gjithë jemi dëshmitarë që kemi dashur të besojmë që qeveritarët dhe Presidenti i Shtetit do të jetë mbrojtësi i të drejtave tona, por kjo qartazi u pa në këto vite prandaj ndodhi si ndodhi dhe patëm disa presidentë në krye të shtetit, por shpresoj se shpresat nuk do të humbim të paktën me presidenten aktuale…
Shqiptarët e Kosovës kanë qenë gjithmonë njerëz të preokupuar me hallet e tyre individuale dhe familjare duke u munduar të sigurojnë jetesën për familjet e tyre, fakti më i mirë për këtë jemi vetë ne të cilët jemi shpërndarë nëpër katër anët e botës vetëm e vetëm të mbijetojmë, dhe tash se fundmi kjo ministria e “di as pores” na e ka vu emrin mërgata dhe kurbetçinj.
Është momenti, aftësia dhe mundësia e votuesit që t’ua kujtojmë atyre “carëve” që janë kandidatë se ata janë në ato poste përmes nesh, dhe se janë pasuruar përmes premtimeve dhe mashtrimeve të tyre që ne ua kemi pranuar.
Hesapet janë shumë të thjeshta si votuam si nuk votuam prapë jemi ne ata të cilët në dekadat e ardhshme do t’i paguajmë çmimet dhe borxhet e injorancës dhe mjegullës që Kosova po kalon nëpër të, e vërteta e hidhur por e vërtet se sipas sondazheve populli i Kosovës ka akoma bindje dhe shpresë se ndërkombëtarët do t’i “qesin punët e tona në binar” sepse disa nga këta tonët janë ne gjendje te paguajnë çdo lloj çmimi vetëm e vetëm te shpëtojnë nga drejtësia dhe gjykimi i gjynaheve qe i ka kaplua ne dekadën e fundit, prandaj s’na mbetet tjetër vetëm se te lutemi qe këta te huajt te na largohen sa ma shpejt nga Kosova jone e dashur pasi te najë qesin punët tona ne binar …
Mithat Ibrahimi
Sipas shumë pyetjeve që kam bërë deri sa isha në Kosovë unë mendoj se njerëzit e ndërgjegjshëm nuk dalin në vota për arsye se nuk din se kujt ti ja japin votën, duke u bazuar në fjalët e tyre se për momentin askush nuk meriton votën e një qytetari të mjerë.
Arsyeja është shumë e thjesht: populli po keqpërdoret në mënyrën më të ulët si të ishte një kafshë shtëpiake e atyre votë-fituesve, edhe pse ata votë-fitues nuk e di që punojnë për ato ‘’kafshë’ sepse vota e tyre ju ndihmon që ata të dalin në ato pozita dhe të ulen në ato ulëset e buta dhe se vota e tyre paguan pagat e majme që kanë.
Unë si qytetar i po ati vendi jam munduar që t’i bindi të dalin në vota sepse vota e tyre po keqpërdoret edhe pse ai nuk del për të votuar si i ka hije një qytetari të thjeshtë, prandaj me një këshillë për të gjithë ju tash se arseja pse unë mendoj që duhet të dilet në votime është që atë votë mos ja jap ati apo asaj partie që e urren më shumë, le të marrë dikush që ju e urreni më pak apo mendoni se nuk është po aq shpërdorues sa partia apo individi tjetër.
Kur unë isha sivjet në Kosovë vërtetova që prindërit e mi ende nuk kishin vdekur, sepse ata ende nuk kishin çertifikatën e vdekjes që do të thotë se edhe ato vota janë valide për dikw… Prandaj i bëjë thirrje edhe njëherw të gjithë atyre që kanw mundësin të ndalojnë këtë vrull të gabuar le ta bëjnë sa më shpejt që është e mundur.
Kur është fjala për diasporën e shkretw që si zakonisht lihet anash gjithmonë kur është momenti më i duhur, unë mendoj që edhe ne si diasporë e bëjmë punën asgjë, që do të duhej që kjo votë të merret me seriozitetin më të madh sepse nëse mendojmë për një të ardhme funksionale për vendin tonë duhet filluar që nga vota jonë që ka vlerë shumë të rëndësishme.
Nëse dikush pyet se ne si diasporë a jemi të braktisur nga votë-fituesit?
Unë mendoj se po në një njëfarë mënyre, arsyeja pse mendoj është sepse ata / ato ia kanë friken diasporës sepse nuk din se kush për kënd do të votoj ndërsa, sa i përket popullit që jeton në Kosovë e kanë shumë më lehtë të kontrollohet, të korruptohet apo edhe të keqpërdoret.
Nëse dikush pyet se ne si diasporë a jemi braktisës.
Prapë mendoj se po duke u bazuar në faktin se interesimi jonë është shumë i vogël për të bërë një gjë për vendin tonë. Unë mendoj se edhe nëse nuk na lejohet të votojmë ne duhet ta ngremë zërin dhe të kërkohet vota jonë mirëpo, paramendo sikur dikush të mundëson të votosh dhe atë e refuzon atëherë mendoj se po e braktisim vetveten nga vendi ynë. Unë mendoj që diaspora jo vetëm që nuk duhet të kursej një votë mirëpo, duhet të bëjë shumë më tepër sepse unë gjithmonë kam thënë se vendi ynë do të jetë mirë atëherë kur menaxhohet nga diaspora sepse mendimi dhe përvoja e diasporës është krejtësisht tjetër në krahasim me atë të vendit tonë.
Atje mendoj nëse nuk gabohem se ka humbë ajo ndjenja patriotike, tani kanë vetëm ndjenja partiake e fatkeqësisht këto ndjenja po zgjerohen edhe tek populli i mjerë…
Të braktisur apo braktisës?
Departamenti i Përgjithshëm i Prokurorisë Themelore në Mitrovicë ka marrë aktvendim për fillimin e hetimeve kundër Aleksandër Vulinit, ministër pa portofol në Qeverinë e Serbisë.
